طفلتى وماما بابا

طفلتى وماما بابا

يوم جديد من حياة طفلتى الصغيره"بسمله" هاحكيهولكم اليوم:

طفلتى خرجت مع ماما:
اليوم كانت مامة "بسمله" عاوزه تخلى "بسمله" معايا ,لكن طفلتى كان ليها رأى آخر,وكانت مستعده إنها تخرج مع مامتها للحضانه,وده بردو كان رأيي :) (لما بسمله بتكون معايا باتعب جداً)البنت حركتها كتيره,وعاوزه تتنقل كتير,وعاوزه حد يكون متابعها طول اليوم ,وده عمل شاق..
الصراحه البنات اللى بيكونو مع الأطفال طول اليوم كتر خيرهم إنهم بيستحملوا كل  الأطفال الموجوده فى الحضانه,وبيستحملوا طلباتهم الكتيره,وتنطيطيهم طول اليوم هناك وهناك..

الأرشيف

بسمله رجعت من الحضانه:
رجعت "بسمله" من الحضانه وكانت نايمه فى حضن مامتها,وأول ماحطتها على السرير صحيت تعيط,وبعد مافاقت كانت خدودها حمرا جداً :)  ,وبعد شويه فضلت تلعب وتحرك الكرسي هنا وهناك,وبعد كده جتلى علشان تلعب معايا,وهى بتقول ..

طفلتى ماما بابا:

بسمله بتنادم عليه وتقول"ماما" وكل ما أقولها قول "بابا ياحبيبي "بردو مافيش واللى فى دماغها فى دماغها..
حتى إنى كنت باتكلم مع والدتى فى مره فى البلد عن الحاجه دى,وفجأه قالت "بسمله الكلمه قدام والدتى ,فقلت لوالدتى :هى تقول لأى حاجه بابا إلا أنا تقولى "ماما".. على فكره هى بتقول على البيضه"بيبه,وساعات بابا" وعلى حاجات كتير "بابا..بابا" علشان نجيبهالها"
يعنى معظم الحاجات بتقول عليها بابا إلا أنا..

صوره من الأرشيف

طفلتى خرجت معايا:
بسمله وهى مع مامتها,وهى بتبتسم طلبت  بصوت عالى إنى أجيبلها كاراتيه ,وقالت"تاتيه...تاتيه" ,فقلت لمامتها خليها تلبس علشان أخرج أنا وهى,وفعلاً لبستها,وخدتها معايا وخرجنا ومشيتها شويه وشيلتها شويتين,ورحنا عند أبو حماده بتاع النت ,علشان النت عنده وحش,وبعد كده رحنا اشترينالها الكاراتيه..

بسمله مش عاوزه تسيب الكاراتيه:
واحنا فى طريق العوده للبيت,شفنا جارنا"أبوعمرو" فى الطريق,فحب يلعب ويهزر مع "بسمله" فخد منها الكراتيه ,فبصتله بزعل ورفعت إيديها علشان تعترض :) ,فقالها:لا إنتى مش ساهله على كده ,وبسرعه إدالها الكيس تانى (من خوفُه بقى :)  ) ,وبعد كده رجعنا للبيت,وبسمله فضلت تتفرج شويه على التليفيزيون...

طفلتى والنور اللى قطع:

قطع النور,وكان التليفون رن,ف"بسمله" كانت فى الوقت ده طالبه معاها إنها ترد على التليفون,ومسكت التليفون أول ماسمعت إنى بكلم والدتى ,وفضلت تقول"تيتا" وفضلت تقولها ألو وتتكلم بطريقة الأطفال,وكإنها بتقول حاجه لوالدتى (الله أعلم بقى,لما تكبر هقولها كنتى بتقولى إيه)..
بعد شويه أكلنا وأكلت "بسمله" ونامت ..الحمد لله
انتظروا حكايات طفلتى بإذن الله ويوم جديد..

اقرأ المزيد

بعد غياب:انا وطفلتى

طفلتى فى البيت

بعد غياب لمدة 3 أيام رجعتلك علشان أحكيلكم عن طفلتى,واللى قلتلكم قبل كده إنى نزلتها عند جدها فى البلد علشان تغيرجو:

طفلتى فى بيت جدو:

بعد مانزلت "بسمله"عند بيت جدو:قررت أنا كمان أنزل البلد وفعلاً نزلت أنا ومامة"بسمله" وهناك شفنا"بسمله"بتلعب ومبسوطه مع عمتها,ومع والدى ووالدتى,وأكتر حاجه كانت بتبسط "بسمله" إنها تلعب مع الكتاكيت,وتشوفهم وهما بيجرو قدامها..

طفلتى فى بيت جدها

طفلتى بعد غياب:

بعد 3 أيام فى البلد راحت مامة "بسمله الشغله لأن كان فى إجازه فى الشغل بمناسبة (25 يناير) ,المهم خدت معاها"بسمله" للحضانه,وبعد مارجعو ..

بسمله نورت البيت:
بعد مارجعت "بسمله للبيت,نورتو على الآخر :), لدرجة إن الإزعاج رجع تانى للبيت,وفضلت طول اليوم لحد اللحظه تفتش فى الحاجات,وتلعب بكل حاجه قدامها,ومانامتشي ولالحظه,وكإنها مشتاقه للتخريب فى أى حاجه..

بسمله والغساله:

مامة "بسمله"شغلت الغساله علشان تغسل,و"بسمله" وقفت قدام الغساله فتره تتفرج عليها وهى بتدور والغسيل بيدور جواها,وكإنها بتناقش نظرية دوران الأرض :)...

بسمله وعلبة السمنه:

بسمله ماسكه فى إيديها العلبه الفاضيه بتاعة السمنه,وحاطه جواها لعبها,وشغاله تلعب بيهم على الكنبه جنبي,وأول ما مامتها فتحت البلكونه جرت عليها علشان تتفرج على الناس من فوق كعادتها...

"بسمله" اشتاقت فعلاً للبيت...

انتظرو حكايات طفلتى دوماً بإذن الله

اقرأ المزيد

ولادة طفلتى

ولادة طفلتى

زى ماقلتلكم إن "بسمله من الأمس فى بيت جدها,علشان كده هنحكى قصصها وهى صغيره...

يوم ولادة "بسمله":

اليوم اللى اتولدت فيه "بسمله" أنا كنت مستنيه ليه كتير,لأن والدتها كل ماكانت بتتعب شويه كنت باجرى بيها على الدكتوره,لكن لما جاء ميعاد الولاده اتصلت عليه أخت المدام تقريباً قبل الفجر بسويعات,وبعد ما اتصلت أخد المدام عندى جريت فى الشارع علشان أدور على تاكسي من البلد,وفعلاً لقيت تاكسي من البلد خدنا ورحنا لعيادة الدكتوره اللى متابعه حالتها,وماكنتشي الدكتوره موجوده,وكانت الممرضات فى العياده بيتابعو المدام لغاية لما حضرت دكتوره تبعها(لأن الدكتوره كانت مسافره) وخدناها لمستشفى بره العياده,وهناك ولدت المدام قيصريه,وفى الوقت ده أنا كنت باقطع تذكرة دخول تحت فى المستشفى ,وأول ماخلصت وطلعت فوق فى المكان بتاع العمليه,لقيتهم شايلين طفله حلوه,فبقولهم: بتاعة مين دى (هههههه أثار الفرحه)فقالولى:بنتك.. فخدتها بين إيديه,وماصدقتش..لأن أول مره أبقى أب ,ويبقالى طفله,تقولى يابابا ,بعد ماكنت بقولها بس..
لعد كده طلعنا فوق فى الأوضه اللى كانت مخصصه لاستقبال المدام بعد العمليه,وكنت سايب المدام الصراحه وفضلت أتفرج على البنت وألاعب فيها..وهى ماكنتشي لسه فتحت عينيها كويس..

سبحان الله !البنت فى الأول كانت بيضه بياض غير عادى,وبعد فتره فى الأشهر اللى بعدها اتغير لونها لسمار,وبعد كده لبياض..

بعد كده خدنا المدام للبلد تقريباً بعدها بيوم,وبدإت حفلات تنظيم الأكل للمدام(فراخ وحمام وحاجات تانى)علشان العمليه اللى عملتها..

يوم ماتبقى أب أو تبقى أم هتحسوا بجد بإحساس غير طبيعى,ومهما عمل فيكم أولادكم مش ممكن تزعلو منهم,لكن الواحد بيتمنى إن أولاده يكونوا بارين بيه,ومايكونوش من الأبناء العاقين لوالديهم..
انتظرو حكايات طفلتى

اقرأ المزيد

بالرغم من انى مبسوط

ضحكة بسمله الجميله

بسمله مش هنا:
مع إنى مبسوط بالهدوء اللى اتحول ليه البيت فجأه إلا إنى حاسس بالفرق(ملل شويه,وحزن شويتين)..
الأطفال ليهم بهجه بتملأ المكان,وأكيد دلوقتى هى مش ساكته مع جدتها وجدها,وأكيد أختى سايبه كل حاجه دلوقتى وبتلعب معاها..
كل يوم: كل يوم بيعدى عليه باكتشف غلاوتها أكتر وأكتر,بالرغم من شاقوتها اللى تاعبانى,ومش مخليانى باعمل أى حاجه فى وجودها جنبي,(ورق بتقطعه,جهاز وبتخلينى مش قادر أقعد عليه),لكن بردو أنا فى أيام الدراسه بكون مقصر فى البيت,لأنى فى أغلب اليوم مش بكون موجود معاهم,وساعات قليله اللى باقضيها,إذا كنت أساساً بشوفهم(لأنى مش بشوفهم إلا ساعة النوم وساعة الغداء وبس,لكن أرجوع وأقول كلو علشان خاطرها وعشلان خاطر إخواتها المستقبليين بإذن الله..

مامة بسمله حلمت:
مامة بسمله حلمت إنها خلفت ووالدتى شالت "بسمله وسابت المولود الجديد,فمامة بسمله فى الوقت ده سألت والدتى وقالتلها:إيه نوع الطفل؟ فقالتلها: بنت,وهى أحلى من "بسمله".. فمامة "بسمله" ماصدقتشى فى الحلم,وكانت عاوزه تفتش اللفه علشان تشوف الطفله..
(هههه اللى يجيبو ربنا كويس بإذن الله)...

مامة بسمله بتخيرنى:
مامة "بسمله" مديانى فرصه,وبتقولى حاول تتعلم الهدوء علشان نخلف تانى,وإلا لو بقيت فى العصبيه اللى أنا فيها مش هينفع نخلف دلوقتى,وكمان لإنها مش هتقدر على طفلين لوحدها ,فلازم أساعد معاها,وبينى وبينكم أنا حاسس إنى مش هاتغيرفى عصبيتى,بس هحاول بإذن الله وربنا يعين ويساعد..
أنا هحاول شويه كده أطمن على "بسمله" وبإذن الله أكملكم حكايتها لليوم..كل سنه وانتو طيبين (ذكرى ثورة يناير باقى عليها القليل..)
حكايات طفلتى لاتنتهى فانتظرو المزيد والمزيد

اقرأ المزيد

بسمله مع جدو

basmala today

تعالو نحكى اليوم من أوله:

بقية قصة أمس:
امبارح بقى أنا ماكملتش باقى اليوم مع "بسمله" علشان كده قررت أكملكم باقى قصة امبارح فى كام سطر..
امبارح "بسمله" صحيت من النوم فى المغرب,وهى بقى زعلانه كعادتها لإنها لسه صاحيه من النوم,لكن شويه وفاقت وبإدت تلعب,وزهقت مامتها من كتر إنها عاوزه الحاجات اللى على الغساله والطرابيزه,وكلمة"دى" يعني عاوزه الحاجه دى كترت اليومين دول,وبالذات للحاجات اللى بنخبيها عنها,لدرجة إنى مش عاوز أخلى حاجه فى البيت منها...
المهم :صليت المغرب,وبعد كده لعبت أنا وهى استغمايه,وبعد كده النور قطع كعادته اليومين دول,بالرغم إننا فى أيام الشتاء,وبعد كده جبنا الأكل علشان ناكل بعد صلاة العشاء,و"بسمله"مسكت المعلقه وفضلت تنتور فى الأكل وتشي العيش من قدامنا ,ومامتها تعبت منها فبقيت تخبي الأكل منها,ومننا علشان "بسمله" ماتخبطشي فى الأكل..
خلص اليوم ,و"بسمله"نامت,وسبحان الله لما شفتها نايمه(كإنى شايف ملاك قدامى,وبردو باتخيل فى يوم من الأيام وأنا نايم تجيلى "بسمله تصحينى وهى بتبوسنى وتقولى (إصحى يابابا علشان ماتتأخرشى على الشغل)...

بسمله بتلعب مع الأسد

بسمله فى الصباح:
النهرده الصبح بقى مامة "بسمله خلتها معايا ,وجابتهالى فى السرير وأنا نايم ,وماكنتش عاوز أصحى لكن "بسمله"صحيتنى غصب عنى وشالت من عنى البطانيه,وهى بتقولى(بابا...بابا),وبعد كده مامتها طلعت,فجابتلى اللعب "بسمله" ,لكن أنا دخلت علشان أصلى ففضلت تصرخ وتعيط,ففضلت أكلمها فى الحمام غصب عنى علشان ماتبكيش,وبعد ماطلعت بطلت بكاء,وبعدين ماصليت فضلنا نلعب بالألعاب,واحنا بنلعب فجأه..

بسمله والكمبيوتر:

بسمله سابتنى واحنا بنلعب وجرت على الكمبيوتر,وفضلت تتكتك فى الكيبورد ,وأنا خليتها تتكتك علشان تزهق وتقوم,وهى كانت بتستفزنى والدليل على كده إنها كانت بتلعب فى الزراير وتبص عليه من تحت لتحت علشان تشوف أنا هاعمل إيه,وأنا كنت ببوسها وأضحكلها,وهى كانت مبسوطه وفرحانه لأنى ولأول مره ما أزعقلهاش بسبب الكمبيوتر..

بسمله جابت لعبها جنب الكمبيوتر

بسمله بدإت تغلس:
بعد كده "بسمله" شاورتلى على الغساله وهى بتقولى (دى..إدى) وبعد كده رفعتها على الغساله علشان أشوف هى عاوزه إيه,لكن قعدت على الغساله ومارضيتشي تنزل,وأنا الصراحه مش بحب إنى أتذنب قدام حاجه كده,فقلت:هنزلك عند "تيتا"ففرحت ولبستها ..

رحلة بسمله لتيتا:

اتصلت مامة "بسمله" وقالتلى ماتنزلهاش علشان الجو برد جداً والموتوسيكل هيتعبها,لكن أنا الصراحه وصلت معايا للآخر مع"بسمله" فقولتلها:لأ..خلاص هننزل بإذن الله,وفعلاً لبستها ولبست بردو وركبنا الموتوسيكل علشان ننزل للبلد ,ولبستها الشال بتاعى واحنا على الموتوسيكل وسُقت الموتوسيكل بالراحه علشان ماتتعبشي"بسمله"..

بسمله وصلت للبلد:
أول ماوصلنا وسمعت والدتى الموتوسيكل ,وسمعت إن بسمله جت (من صوت العيال) نزلت بسرعه ونادمت على  "بسمله" وبسمله جرت على "والدتى" ووالدى بردو فرح "ببسمله" وقرر إنه ياخدها ويطلعو بره يشترولها حاجه من السوبرماركت..
وخلاها تمشي معاه وهو مبسوط,وفرحان,ورجعو من بره بالحاجات وهى بردو ماشيه بجواره...
اليوم أكيد هيبقى حلو مع"بسمله" بإذن الله ,لأنها وسط ناس بتحبها فى البلد..
انتظرو حكايات طفلتى 

اقرأ المزيد

بسمله خرجت مع بابا

بسمله مشغوله فى الشيبسي

مامة رجعت من الشغل:
رجعت مامة "بسمله"من الشغل ,وكانت جايبه معاها شيكولاته ل"بسمله"علشان هى كانت عارفه زى مابتقول إنها كانت عاوزاها..
ولما شافت "بسمله"على الباب إديتهالها,وفضلت تطبطب عليها لأنى كنت ضاربها وكانت بتعيط على الباب..
وبعد كده سكتت "بسمله"بعد ما أكلت الشيكولاته,وبعد كده جت "بسمله عندى وادتنى حته من اللى معاها,وطلعت "بسمله"فى الصاله ,علشان تدور على اللى جايباه مامتها,ولقيت فى كيس كبير,ففتحته,ولقيت نتيجه خدتها فى النقابه بتاعتها,و"بسمله كانت عاوزه تقطع الورق وتخلى الجزء الكارتون لوحده(هى كده بتحب التخريب..

بسمله وبث المباشر:
قررت بعد كده إنى أصور بسمله مباشر وقلت لمامتها تسرحلها شعرها علشان تتصور معايا,وفعلاً مامتها شطفتها,وغيرتلها,وبعد كده اشتغلت دعايا للموضوع,كانت "بسمله خلصت,وقعدتها جنبي,لكن بعد شويه طارت منى ومارضيتشي تقعد,لكن حاولت معاها لحد لما جه ميعاد البث,وسجلنا مع بعض مباشر,وبعد ماخلصنا خدت منها الريدر اللى كانت بتخرب فيه طول البث..

بسمله بتنضف ايديها

بسمله خرجت مع بابا:
بعد كده صليت العصر,وقررت إنى أخرج مع"بسمله"علشان نجيب حاجات من السوبرماركت,وطول الطريق خليتها مشيت لوحدها وأنا ماسك إيدها طبعاً,وعند السوبرماركت,بدإت تمارس دور الغلاسه,وطلعت كيس شيبسي من الكرتونه بتاعة الراجل,واداها مصاصه من عنده,وبدإت تطلع فى زجاجات المياه الغازيه,وتلعب وتشاورلى على حاجات,وبعد ما اشترينا وخلصنا,رجعتها بردو مشي علشان تتعود إنها تمشي لوحدها من غير ماحد يشيلها..

بسمله رجعت للبيت:
بعد كده رجعنا للبيت,و"بسمله"كانت عاوزه تشيل الكيس لوحدها,وأنا مارضيتشي لأن الكيس كان كبير والحاجات تقيله عليها,وبعد كده "بسمله"فتحت كيس الشيبسي وبترمى الشيبسي فى كل مكان,ومامتها بعد شويه هتشوفها ,وتزعقلها على اللى عملتو ده(مامتها الصراحه ولا بتزعق ولاتعرف تزعق)..
انتظرو حكايات "بسمله المتجدده بإذن الرحمان

اقرأ المزيد

بث مباشر:طفلتى اليوم

بث مباشر بعد قليل لطفلتى

كما وعدتكم إخوانى الكريم بأنه سيكون هناك المزيد من البث الخاص بمدونة طفلتى..
فسيكون هناك بإذن الله تعالى هناك بث الساعة 3:30 مساءاً بتوقيت مصر فانتظرو البث..
البث سيكون على اليوتيوب مباشرة,وإذا حدث هناك أى أخطاء فسنقوم بتغيير الرابط بإذن الله تعالى فانتظرو البث بإذن الله تعالى

البث المباشر:

اقرأ المزيد