طفلتى الجميله بعد نومٍ عميق استرحتُ فيه قليلاً من تعبها واستكشافها المتواصل أفاقت,وجلست بجوارى وأخذت تلعب فى الموبايل الخاص بى والذى جعلته لى لايتحمل أن ابحث فيهِ عن أسماء أو اتصالات أو أى شئ,فهى جعلته لعبتها المفضله,وكلما رأتهُ أمامها تقسمهُ إلى ثلاثة أقسام,وهى :
جسم الموبايل.. والكوفر.. والبطاريه..
وأهم جزء,ويعتبر المفضل لديها هو البطاريه:لأنها بتفضل تمضغ فيها وتغيظنى بقى..على فكره البطاريه فى فصل الصيف كانت وارمه خالص,ولكن لما جاء الشتاء رجعت لحالتها الطبيعيه تانى,لكن مع "بسمله" مش هيفضل الوضع زى ماهو..
المهم: قعدت جنبي "بسمله" وهى ظاهر عليها الزعل منى لأنى زى ماقلتلكم فى التدوينه اللى قبل كده إنى كنت زعقت فيها جامد ,ونامت وهى زعلانه..
بعد كده واحنا وقاعدين جت مامتها من الشغل,وجابتلها كيس شبسي معاها,فخدت"بسمله"الكيس من مامتها من غير ماتبوسها,وكإنها البنت طالعه بتاعة مصلحتها(هههههه كل الأطفال كده) المهم وبعد كده فضلت مامة "بسمله" تهزر معاها وتقولها ماتديش بابا اللى زعلك,لكن "بسمله" بالرغم من ده إدتنى بالعند فى مامتها ..
على فكره الأطفال كل شويه أعرف فيهم صفة الطبيه والحنيه,والنسيان للزعل(بس والله أعلم بيقولو إن الأطفال مش بينسو)
بس يمكن لأن البنات بيحبو باباهم أكتر فيمكن علشان كده بيحاولو إنهم ينسو إن باباهم بيزعلهم(لكن مش نسوق فى كده طبعاً)
دلوقتى هى جتلى علشان أكل وبتقولى(بابا أم..وبتقول كلام تانى علشان أروح آكل معاهم..طبعاً كلام صغيرين لسه مش عارفين يتكلمو ..لأن عمرها عام وخمس شهور)..
أسيبكم بقى وأروح آكل معاهم..
حكايات الأطفال لاتنتهى..فانتظرو المزيد
0 التعليقات:
إرسال تعليق