 |
| بسمله بتبوس الألعاب |
اليوم هو الموافق الأربعاء 21/1/2015 ,والصراحه أنا تعبان مع "بوسبوس"النهرده ,وضربتها.. تعالو نحكى من الأول..
بسمله فى الصباح:
صحيت الصبح بدرى على صوت مامة "بسمله"وهى بتقولى أنا هاطلع,وبسمله النهرده هتبقى معاك,وعلى فكره أنا كنت نايم متأخر ولما سمعت خبر إن "بسمله"هتبقى معايا النهرده صحيت بسرعه من شدة الصدمه,وبعد كده صحيت "بسمله "بعد كلامى مع مامتها,وجابتهالى مامتها,وخلتها معايا على السرير,وبعد كده فضلت "بسمله تلعب معايا,وتشيل البطانيه من فوق رأسي,وبعد كده مامة "بسمله طلعت,ونزلت بعد كده من على السرير وجبت الألعاب بتاعة "بسمله"علشان نلعب مع بعض وأنسيها إن مامتها خرجت..
صلاة الضُحى:
قررت إنى أتوضأ علشان أصلى,وخليت "بسمله"بتلعب مع لعبها فى الصاله,وبعدها بثوانى لما دخلت أتوضى سمعت "بسمله"واقفه قُدام الحمام مستنيانى أطلع,ولما خلصت طلعت ألاعبها علشان ماتزعلشي,وبعد كده فردت المصليه علشان أصلى ,و"بسمله" نامت قدامى على المصليه زى عادتها,وفردت مصليه تانى,لكنها بردو نامت قدامى وأنا باصلى,وبعد كده كنت بارفع من الركوع وكنت هاسجد فلقيتها اترمت على حجرى,فقررت إنى ما أسجدشي لحد لما تخلص لعب,وبعد كده قمت من السجود ففضلت تلعب فى لبسي,وتضحك..
(أدى العيال نعمل ايه بس معاهم)..,وبعد لما خلصت لعبت معاها شويه,وبعدين بدإت تغلس عليه,وتطلب إنى أجيبلها حاجات من فوق الترابيزه بتاعة السُفره,لكن الحاجات دى مهمه بالنسبالى,فقررت إنى أسايسها بحاجات تانى علشان تبطل زن,فقررت أستنجد بألعابها..
بسمله والألعاب:
جبت الألعاب جنبي وفضلت ألعب معاها وقسمتلها الألعاب اللى هى عباره عن حيوانات إلى جزءين(جزء ياكل وجزء يتاكل)ولما حيوان منهم ييجي ياكل التانى أقولها:عو..وهى تضحك,وبعد كده خليتها هى اللى تمثل الحكايه دى..
وبعد كده قررت إنى أصورها ,وفضلت أقولها :بوسي النونه يا"بوسبوس"وهى ترفع بالواحد وتبوسه,وترميه على الأرض..
 |
| بسمله بتلعب بالألعاب |
بسمله اتضربت من بابا:
بعد كده "بسمله فضلت تزن وتصرخ على حاجاتى(نظاره_والكاميرا)ولومسكتهم فى إيدها هتكسرهم,لأنها اتعودت إنها تمسك الحاجه وتخبطها فى الأرض علشان تفتحها..المهم: أنا فكرت إنى اتسايس معاها,لكن مافيش فايده فزعقتلها ,فزادت بردو فيها,فضربتها على وشها,ونزلتها على الأرض وسيبتها ودخلت الأوضه التانيه,وهى فضلت تبكى وتعيط,وتبص كل شويه عليه وترجع تانى,علشان تشوفنى هاعمل إيه لكنى سيبتها علشان تتعلم إننا لما نقولها تسكت تسكت,وبعد كده قررت إنى أصالحها,فقولتلها:تعالى يا"بوسبوس" فجتلى تجرى واترمت فى حضنى,وفضلت ساكته حوالى كام ثانيه,وبعد كده..
بسمله والورقه والقلم:
بعد كده قلت أسكتها وأجيبلها ورقه وقلم علشان ترسم فيهم ,وتسكت,لكن فضلت تشخبط على الجهاز,وكل ما أبعدها ترجع تانى تشخبط على الجهاز,فزعقتلها تانى,فاترمت بردو فى حضنى وفضلت تكمل فى شقاوتها بردو بعد كده..
بسمله وألأكل:
بسمله فى بداية اليوم أكلتها زبادى,وبعد كده بشويه أكلتها كاراتيه ,وعلشان أخليها تنام بعد المشاكل اللى سببتهالى,قررت أأكلها علشان تنام,لكن أكلتها وبردو زى ماهى مش مبطله,وتعبانى لدرجه ماحدش يتخيلها(أنا مش عارف النهرده هى ليه مش ناويه تجيبها البر..
أسيبكم وعلى وعد نكمل بإذن الله باقى اليوم
0 التعليقات:
إرسال تعليق