ولادة طفلتى

ولادة طفلتى

زى ماقلتلكم إن "بسمله من الأمس فى بيت جدها,علشان كده هنحكى قصصها وهى صغيره...

يوم ولادة "بسمله":

اليوم اللى اتولدت فيه "بسمله" أنا كنت مستنيه ليه كتير,لأن والدتها كل ماكانت بتتعب شويه كنت باجرى بيها على الدكتوره,لكن لما جاء ميعاد الولاده اتصلت عليه أخت المدام تقريباً قبل الفجر بسويعات,وبعد ما اتصلت أخد المدام عندى جريت فى الشارع علشان أدور على تاكسي من البلد,وفعلاً لقيت تاكسي من البلد خدنا ورحنا لعيادة الدكتوره اللى متابعه حالتها,وماكنتشي الدكتوره موجوده,وكانت الممرضات فى العياده بيتابعو المدام لغاية لما حضرت دكتوره تبعها(لأن الدكتوره كانت مسافره) وخدناها لمستشفى بره العياده,وهناك ولدت المدام قيصريه,وفى الوقت ده أنا كنت باقطع تذكرة دخول تحت فى المستشفى ,وأول ماخلصت وطلعت فوق فى المكان بتاع العمليه,لقيتهم شايلين طفله حلوه,فبقولهم: بتاعة مين دى (هههههه أثار الفرحه)فقالولى:بنتك.. فخدتها بين إيديه,وماصدقتش..لأن أول مره أبقى أب ,ويبقالى طفله,تقولى يابابا ,بعد ماكنت بقولها بس..
لعد كده طلعنا فوق فى الأوضه اللى كانت مخصصه لاستقبال المدام بعد العمليه,وكنت سايب المدام الصراحه وفضلت أتفرج على البنت وألاعب فيها..وهى ماكنتشي لسه فتحت عينيها كويس..

سبحان الله !البنت فى الأول كانت بيضه بياض غير عادى,وبعد فتره فى الأشهر اللى بعدها اتغير لونها لسمار,وبعد كده لبياض..

بعد كده خدنا المدام للبلد تقريباً بعدها بيوم,وبدإت حفلات تنظيم الأكل للمدام(فراخ وحمام وحاجات تانى)علشان العمليه اللى عملتها..

يوم ماتبقى أب أو تبقى أم هتحسوا بجد بإحساس غير طبيعى,ومهما عمل فيكم أولادكم مش ممكن تزعلو منهم,لكن الواحد بيتمنى إن أولاده يكونوا بارين بيه,ومايكونوش من الأبناء العاقين لوالديهم..
انتظرو حكايات طفلتى

اقرأ المزيد

بالرغم من انى مبسوط

ضحكة بسمله الجميله

بسمله مش هنا:
مع إنى مبسوط بالهدوء اللى اتحول ليه البيت فجأه إلا إنى حاسس بالفرق(ملل شويه,وحزن شويتين)..
الأطفال ليهم بهجه بتملأ المكان,وأكيد دلوقتى هى مش ساكته مع جدتها وجدها,وأكيد أختى سايبه كل حاجه دلوقتى وبتلعب معاها..
كل يوم: كل يوم بيعدى عليه باكتشف غلاوتها أكتر وأكتر,بالرغم من شاقوتها اللى تاعبانى,ومش مخليانى باعمل أى حاجه فى وجودها جنبي,(ورق بتقطعه,جهاز وبتخلينى مش قادر أقعد عليه),لكن بردو أنا فى أيام الدراسه بكون مقصر فى البيت,لأنى فى أغلب اليوم مش بكون موجود معاهم,وساعات قليله اللى باقضيها,إذا كنت أساساً بشوفهم(لأنى مش بشوفهم إلا ساعة النوم وساعة الغداء وبس,لكن أرجوع وأقول كلو علشان خاطرها وعشلان خاطر إخواتها المستقبليين بإذن الله..

مامة بسمله حلمت:
مامة بسمله حلمت إنها خلفت ووالدتى شالت "بسمله وسابت المولود الجديد,فمامة بسمله فى الوقت ده سألت والدتى وقالتلها:إيه نوع الطفل؟ فقالتلها: بنت,وهى أحلى من "بسمله".. فمامة "بسمله" ماصدقتشى فى الحلم,وكانت عاوزه تفتش اللفه علشان تشوف الطفله..
(هههه اللى يجيبو ربنا كويس بإذن الله)...

مامة بسمله بتخيرنى:
مامة "بسمله" مديانى فرصه,وبتقولى حاول تتعلم الهدوء علشان نخلف تانى,وإلا لو بقيت فى العصبيه اللى أنا فيها مش هينفع نخلف دلوقتى,وكمان لإنها مش هتقدر على طفلين لوحدها ,فلازم أساعد معاها,وبينى وبينكم أنا حاسس إنى مش هاتغيرفى عصبيتى,بس هحاول بإذن الله وربنا يعين ويساعد..
أنا هحاول شويه كده أطمن على "بسمله" وبإذن الله أكملكم حكايتها لليوم..كل سنه وانتو طيبين (ذكرى ثورة يناير باقى عليها القليل..)
حكايات طفلتى لاتنتهى فانتظرو المزيد والمزيد

اقرأ المزيد

بسمله مع جدو

basmala today

تعالو نحكى اليوم من أوله:

بقية قصة أمس:
امبارح بقى أنا ماكملتش باقى اليوم مع "بسمله" علشان كده قررت أكملكم باقى قصة امبارح فى كام سطر..
امبارح "بسمله" صحيت من النوم فى المغرب,وهى بقى زعلانه كعادتها لإنها لسه صاحيه من النوم,لكن شويه وفاقت وبإدت تلعب,وزهقت مامتها من كتر إنها عاوزه الحاجات اللى على الغساله والطرابيزه,وكلمة"دى" يعني عاوزه الحاجه دى كترت اليومين دول,وبالذات للحاجات اللى بنخبيها عنها,لدرجة إنى مش عاوز أخلى حاجه فى البيت منها...
المهم :صليت المغرب,وبعد كده لعبت أنا وهى استغمايه,وبعد كده النور قطع كعادته اليومين دول,بالرغم إننا فى أيام الشتاء,وبعد كده جبنا الأكل علشان ناكل بعد صلاة العشاء,و"بسمله"مسكت المعلقه وفضلت تنتور فى الأكل وتشي العيش من قدامنا ,ومامتها تعبت منها فبقيت تخبي الأكل منها,ومننا علشان "بسمله" ماتخبطشي فى الأكل..
خلص اليوم ,و"بسمله"نامت,وسبحان الله لما شفتها نايمه(كإنى شايف ملاك قدامى,وبردو باتخيل فى يوم من الأيام وأنا نايم تجيلى "بسمله تصحينى وهى بتبوسنى وتقولى (إصحى يابابا علشان ماتتأخرشى على الشغل)...

بسمله بتلعب مع الأسد

بسمله فى الصباح:
النهرده الصبح بقى مامة "بسمله خلتها معايا ,وجابتهالى فى السرير وأنا نايم ,وماكنتش عاوز أصحى لكن "بسمله"صحيتنى غصب عنى وشالت من عنى البطانيه,وهى بتقولى(بابا...بابا),وبعد كده مامتها طلعت,فجابتلى اللعب "بسمله" ,لكن أنا دخلت علشان أصلى ففضلت تصرخ وتعيط,ففضلت أكلمها فى الحمام غصب عنى علشان ماتبكيش,وبعد ماطلعت بطلت بكاء,وبعدين ماصليت فضلنا نلعب بالألعاب,واحنا بنلعب فجأه..

بسمله والكمبيوتر:

بسمله سابتنى واحنا بنلعب وجرت على الكمبيوتر,وفضلت تتكتك فى الكيبورد ,وأنا خليتها تتكتك علشان تزهق وتقوم,وهى كانت بتستفزنى والدليل على كده إنها كانت بتلعب فى الزراير وتبص عليه من تحت لتحت علشان تشوف أنا هاعمل إيه,وأنا كنت ببوسها وأضحكلها,وهى كانت مبسوطه وفرحانه لأنى ولأول مره ما أزعقلهاش بسبب الكمبيوتر..

بسمله جابت لعبها جنب الكمبيوتر

بسمله بدإت تغلس:
بعد كده "بسمله" شاورتلى على الغساله وهى بتقولى (دى..إدى) وبعد كده رفعتها على الغساله علشان أشوف هى عاوزه إيه,لكن قعدت على الغساله ومارضيتشي تنزل,وأنا الصراحه مش بحب إنى أتذنب قدام حاجه كده,فقلت:هنزلك عند "تيتا"ففرحت ولبستها ..

رحلة بسمله لتيتا:

اتصلت مامة "بسمله" وقالتلى ماتنزلهاش علشان الجو برد جداً والموتوسيكل هيتعبها,لكن أنا الصراحه وصلت معايا للآخر مع"بسمله" فقولتلها:لأ..خلاص هننزل بإذن الله,وفعلاً لبستها ولبست بردو وركبنا الموتوسيكل علشان ننزل للبلد ,ولبستها الشال بتاعى واحنا على الموتوسيكل وسُقت الموتوسيكل بالراحه علشان ماتتعبشي"بسمله"..

بسمله وصلت للبلد:
أول ماوصلنا وسمعت والدتى الموتوسيكل ,وسمعت إن بسمله جت (من صوت العيال) نزلت بسرعه ونادمت على  "بسمله" وبسمله جرت على "والدتى" ووالدى بردو فرح "ببسمله" وقرر إنه ياخدها ويطلعو بره يشترولها حاجه من السوبرماركت..
وخلاها تمشي معاه وهو مبسوط,وفرحان,ورجعو من بره بالحاجات وهى بردو ماشيه بجواره...
اليوم أكيد هيبقى حلو مع"بسمله" بإذن الله ,لأنها وسط ناس بتحبها فى البلد..
انتظرو حكايات طفلتى 

اقرأ المزيد

بسمله خرجت مع بابا

بسمله مشغوله فى الشيبسي

مامة رجعت من الشغل:
رجعت مامة "بسمله"من الشغل ,وكانت جايبه معاها شيكولاته ل"بسمله"علشان هى كانت عارفه زى مابتقول إنها كانت عاوزاها..
ولما شافت "بسمله"على الباب إديتهالها,وفضلت تطبطب عليها لأنى كنت ضاربها وكانت بتعيط على الباب..
وبعد كده سكتت "بسمله"بعد ما أكلت الشيكولاته,وبعد كده جت "بسمله عندى وادتنى حته من اللى معاها,وطلعت "بسمله"فى الصاله ,علشان تدور على اللى جايباه مامتها,ولقيت فى كيس كبير,ففتحته,ولقيت نتيجه خدتها فى النقابه بتاعتها,و"بسمله كانت عاوزه تقطع الورق وتخلى الجزء الكارتون لوحده(هى كده بتحب التخريب..

بسمله وبث المباشر:
قررت بعد كده إنى أصور بسمله مباشر وقلت لمامتها تسرحلها شعرها علشان تتصور معايا,وفعلاً مامتها شطفتها,وغيرتلها,وبعد كده اشتغلت دعايا للموضوع,كانت "بسمله خلصت,وقعدتها جنبي,لكن بعد شويه طارت منى ومارضيتشي تقعد,لكن حاولت معاها لحد لما جه ميعاد البث,وسجلنا مع بعض مباشر,وبعد ماخلصنا خدت منها الريدر اللى كانت بتخرب فيه طول البث..

بسمله بتنضف ايديها

بسمله خرجت مع بابا:
بعد كده صليت العصر,وقررت إنى أخرج مع"بسمله"علشان نجيب حاجات من السوبرماركت,وطول الطريق خليتها مشيت لوحدها وأنا ماسك إيدها طبعاً,وعند السوبرماركت,بدإت تمارس دور الغلاسه,وطلعت كيس شيبسي من الكرتونه بتاعة الراجل,واداها مصاصه من عنده,وبدإت تطلع فى زجاجات المياه الغازيه,وتلعب وتشاورلى على حاجات,وبعد ما اشترينا وخلصنا,رجعتها بردو مشي علشان تتعود إنها تمشي لوحدها من غير ماحد يشيلها..

بسمله رجعت للبيت:
بعد كده رجعنا للبيت,و"بسمله"كانت عاوزه تشيل الكيس لوحدها,وأنا مارضيتشي لأن الكيس كان كبير والحاجات تقيله عليها,وبعد كده "بسمله"فتحت كيس الشيبسي وبترمى الشيبسي فى كل مكان,ومامتها بعد شويه هتشوفها ,وتزعقلها على اللى عملتو ده(مامتها الصراحه ولا بتزعق ولاتعرف تزعق)..
انتظرو حكايات "بسمله المتجدده بإذن الرحمان

اقرأ المزيد

بث مباشر:طفلتى اليوم

بث مباشر بعد قليل لطفلتى

كما وعدتكم إخوانى الكريم بأنه سيكون هناك المزيد من البث الخاص بمدونة طفلتى..
فسيكون هناك بإذن الله تعالى هناك بث الساعة 3:30 مساءاً بتوقيت مصر فانتظرو البث..
البث سيكون على اليوتيوب مباشرة,وإذا حدث هناك أى أخطاء فسنقوم بتغيير الرابط بإذن الله تعالى فانتظرو البث بإذن الله تعالى

البث المباشر:

اقرأ المزيد

طفلتى ويوم شيبسى

بسمله بتصلى

بسمله بعد الظهر:

أنا بدأت الحكايه الصبح لحد لما جبت الزبادى واللبن ل"بسمله" ووالدى اتصل بى علشان أجيب "بسمله",نكمل باقى قصة اليوم مع "بسمله":
رجعت "بسمله مع مامتها من الشغل,وكانت "بسمله"بقى شايله مع "شيكولاته" جايبهالها مامتها معاها,وحكتلى مامة "بسمله"إنهم لما كانو راكبين العربيه اللى راجعين بيها من الشغل,و"بسمله"أصرت إنها تاكل "تتيه" يعني كراتيه,وبعد مانزلو مامة "بسمله"دخلت بيها محل علشان يشتروا اللى هى عاوزاه,ولما جابتلها الكراتيه,ماسكتتشي على كده ومسكت فى الشيكولاته,والنايتى,وصاحب الدكان قال لمامة "بسمله"مش معايا باقى فخدت حاجه تانى ,علشان الفلوس اللى معاها تخلص,وده بسبب"بسمله"..
المهم ,أنا كنت جايب حاجه ل"بسمله معايا,ولما إديتهالها حصل قلبان فى الشقه..

بسمله معاها كيس شيبسي كبير جدا

بسمله وكيس الشيبسي الكبير خالص:
أنا جبت ل"بسمله" لبن وزبادى وكمان كيس شيبسي كبير قلت أفرح بيه"بسمله" وأول ماشافته "بسمله" خدتو بالحضن وكإنه واحد من العيله,وكان تقريباً الكيس فى نفس طولها,وفضلت تلف وعاوزه تفتحه لكن مامتها قالتلى:لأ لتبوظ الدنيا بيه,ونخليه شويه أحسن..
المهم أنا كنت عاوز أصورها بالكاميرا,وكل ما آجى أصورها تجرى من قدامى والصور تبوظ,وأنا أوقفها,وتجرى,لحد لما مسكتها بإيدى فاعتبرت إن أنا بغلس عليها فبكت واترمت فى الأرض,والكيس فوقيها وكإنه بيت ووقع فوقيها..

بسمله بتلم المصليه

بسمله والغداء:
جلست أنا ومامة "بسمله"والآنسه "بسمله"على الأكل,وكان فى شيبسي على الصينيه بتاعة الأكل,و"بسمله فضلت تاخد فى الشيبسي وتجرى,وتمسك بالوحده وتأكلنا,وبعد كده تقعد وتاكل هى,وبعد كده وقفت بالشيبسي وبدإت توقعه فى الأكل.. وبعد ماخلصنا مسكت الصينيه بتاعة الأكل مع مامتها علشان تساعدها فى إنها تشيل الأكل(مفكره نفسها كبرت النونو دى)..

بسمله وصلاة العصر:
اتوضيت ووقفت علشان أصلى ,وكانت "بسمله" بتلف وهى زعلانه فى الشقه,فقلتلها يللا يا"بوسبوس"نصلى مع بعض,فطارت قُدامى,ونامت على المصليه وكإنها بتصلى,وبعد كده مسكت المصليه ولمتها من قدامى ,لكن بعد كده قلتلها:يللا روحى لماما ,فسمعت الكلام وراحت لمامتها,وبعد كده فضلو يلعبو فى الأوضه التانيه..
وبعد ماخلصت صلاه رحت علشان أنام ففضلت تشد فيه ,ومكانتشي عاوزانى أنام ,وكل ما أنام تقومنى وقعد على السرير ,وتصرخ لما أحط راسي على السرير,وبعد كده دخلت الأوضه التانيه علشان أنام ,وبعد شويه لما صحيت لقيتها هى ومامتها نايمين,فقلت هى صحتنى علشان تنام هى؟؟
المهم أنا سيبتهم وصليت المغرب,وبعد شويه صحيت "بسمله"..

بسمله والإمساك:
صحيت "بسمله وهى بتصرخ فمامتها شربتها عصير,لكن بردو كانت تعبانه وبتصرخ وعملت حمامين ورا بعض,المهم مامة "بسمله عرفت إن عندها إمساك(مش عارف ازاى الصراحه وهى بتعمل حمامين فى اليوم أو أكتر..)المهم إدتها لبوس..وبعد كده ابتدت اللعب..

بسمله وألعاب ماما:
مامة "بسمله كانت جايبالها ألعاب حلوه عباره عن حيوانات كده (تشكيله),وكانت فى كيسها,لكن "بسمله أول ماشافتها أصرت إنها تتفتح,وفعلاً فتحتهالها مامتها وفضلت تلعب بيهم,وتمثل إن الحيوانات بتاكل بعض,وبعد كده خلتنى ألعب معاها غصب عنى(علشان ماتبوظشي الجهاز),وبعد كده فضلنا نلعب ونجرى مع بعض بعد كده ,ونضحك وهى تجرى وتضحك بصوت عالى..

النور قطع:
بعد كده النور قطع,وفتحنا الكشاف,وفضلنا نلعب مع بعض فى الصاله,وقلت لمامة "بسمله"عاوزين ناكل,فقالت هاعمل بطاطس مهروسه,وجابت الآداه اللى بتهرس بيها البطاطس,و"بسمله خدتها من ماما,وفضلت تخبط بيها على الحاجات وتجرى بيها,وبعد كده جابة مامة "بسمله الأكل..

"بسمله والعشاء:
جلسنا على الأكل,وبسمله كانت معانا,وفضلت هاديه شويه,وبعد كده عرفت مكان كيس الشيبسي(اللى فاشل منو)وبعد كده رفعت إيديها,وخدته وفضلت تلف بيه حوالينا(ييجي 10 لفات)وبعد كده فضلت تضحك(ربنا يفرحها كمان وكمان),ودلوقتى "بسمله مع مامتها دلوقتى علشان كده أنا كتبت كتير دلوقتى ..لأنها لوجنبي ماكنتش عرفت أكتب كلمه..

اقرأ المزيد

بسمله بره البيت

بسمله بتتصور

نحكى الحكايه من بداية اليوم وبعد كده نقول إيه حكاية بره البيت:

بسمله فى الصباح:

"بسمله" حكتلى والدتها إنها صحيت بالليل ,وفضلت تعيط,وبعد كده مامتها جابتلها زبادى علشان تأكلها ,فقالت "بسمله لمامتها"لا لا لا",وبعدين اتقمصت ونامت زعلانه,وبعد كده صحيت الصبح بعد مافطرنا,وصلينا الصبح,وكانت نشيطه,مامتها أول حاجه فطرتها,وبعد كده نزلتها على الأرض علشان تبدأ يومها الجديد بحيويه ونشاط..

بسمله وقزازة الزيت:

بسمله انتبهت لزجاجة الزيت اللى بتستخدمها والدتها لشعرها,فخدتها من فوق التسريحه,وبدإت فى رحلة استكشافها,وعلشان تكمل الرحله كان لازم إنها تفتح الزجاجه,علشان كده جتلى علشان أفتحلها الزجاجه,لكنى قولتلها:روحى لماما يا"بوسبوس" فراحت لمامتها فمارضيتشي,فزعلت وفضلت تبكى,وبعد كده حاولت إنى أضحك عليها وفضلت ألاعبها استُغُمايه,وفرحت باللعبه دى,وبدإت تستخبي ,وأنا أستخبي شويه,وبعد كده قلتلها:تعالى حضن,وفعلاً بدإت تكرر لعبة الحضن دى وتجرى عليه علشان تُحضُنى..

بسمله بتقول حاضر

بسمله وصبغة الجزمه:

بعد كده انتبهت "بسمله "لصبغة الجزمه بتاعتى فأخدتها ,واستمرت تشاورلى عليها وتديهالى علشان أفتحهالها,وهى بتقولى"إدى..إدى"علشان أفتحهالها,لكنى رفضت ففضلت بقى تعيط وتصرخ,فخدتها منها,وقلتلها"تاتا..تاتا" فمدتلى إيدها وفضلنا نتمشي لحد لما نسيت واديتها حاجه تانى فى إيدها علشان تنسي(لكن مش فاكر إيه اللى اديتهولها الصراحه) ,..وبعد كده مامة "بسمله"خدتها علشان تشطفها علشان تروح الحضانه معاها,وأنا طلعت قبلهم,ونسيت حاجه فرجعت تانى كانت "بسمله"خلصت ,ووقفتلى قُدام الباب زى كل يوم علشان تودعنى قبل ما أطلع(وكأن الحاجه اللى نسيتها سبب علشان "بسمله"تعمل عادتها فى إنها تطلعنى لغاية الباب)..

بسمله مشغوله بالغسيل

بسمله بره البيت:

وصلنا للعنوان الأصلى ...أكملكم بقى :أنا رحت الشغل وكملنا اليوم وبعد كده وأنا راجع جبت ل"بسمله" اللبن والزبادى معايا علشان ماتفضحناش بالليل,ولما رجعت للبيت,اتصل عليه والدى وقالى :ابقى هات "بسمله" اليوم علشان تقضى اليوم معانا وخدها بُكره..
على فكره "بسمله لما تكون فى البلد بيتابعوها أحسن مننا لأنهم كتار وكمان والدتى عندها حب للأطفال وبتعرف تتعامل معاهم,وكمان الأطفال بيحبوها,و"بسمله" لما بتروح عند والدتى (بتفرح) كتير,وتبدأ تلعب فى كل مكان,وبتشوف الطيور اللى مربياها والدتى وتجرى فى كل مكان,وأختى بتاخد نصيبها فى العنايه ب"بسمله"..(الحمد لله بيحبوها جداً وهى كمان بتحبهم)...
حكايات طفلتى مستمره فانتظرونى إلى نهاية اليوم وقصص جديده لليوم..

اقرأ المزيد

شارلى ابدو هؤلاء أطفالنا

مدونة طفلتى

فى تدوينة سابقه لتلك تحدثت عن علاقتنا بأبنائنا,وأننا نتعامل معهم بالتربية التى علمنا إياها الرسول (صلى الله عليه وسلم)والتى انتقلت إلى أجيالنا,والتى تدعونا إلى حسن معاملة المسلم,وغير المسلم,وأن احرتام الكبير,والعطف على الصغير(هى سماتُ النبي صلى الله عليه وسلم)وبادر بفعلها ليكون هو المثال الشريف الأمثل لنا,فقد قال عنه الله تعالى(ولو كنت فظاً غليظ القلبِ لانفضو من حولك..)صدق اللهُ العظيم,إذاً فإن الخالق قد وصفه باللين والرحمه,وأنهُ ليس فظأ (أى فى القول,وأنه ليس غليظ القلب "فهو صلى الله عليه وسلم"كان رحيماً حتى بالحيوانات والطيور..الخ)..قال تعالى(وما أرسلناكَ إلا رحمةً للعالمين)صدق الله العظيم..

شارلى إبدو والحقد على الإسلام:
فى فرنسا اتجه الكثيرُ من الفرنسيين إلى اعتناق الدينِ الإسلامى وإلا الإذعان بوحدانية الخالقِ تبارك وتعالى,وربما كان ذلك الشئ هو بمثابة كارثةً كبيره لأعداءِ الأديان,وأعداء الدين الإسلامى بالأحرى,فبدؤوا أن يثيرو المسلمين لكى يحاولوأ أن يوقفوا الزحف الإسلامى فى بلادهم,ولكن سبحان الله,فمن أُترفهو فى بلادهم(من المسلمين)خرجوا لكى يدافعو عن نبيهم(صلى الله عليه وسلم)..وهناك من دخل فى الدينِ الإسلامى بعد تلك الأحداث,لأنهم يعلمون أن الدين الإسلامى أكبر منهم,وأنهم فعلو ذلك لأنهم يعلمون بنجاح الدين الإسلامى فى الدخول إلى القلوب ,لأنه دين الرحمة التى تطرقُ الأبواب  العامره,فتدخُلُ بكل حبٍ واحترام..

طفلتى

شارلى إبدو وتعاليم الرسول:
الرسول صلى الله عليه وسلم علمنا الكثير من الأشياء فى حياتهِ ونبهنا للكثير بعد مماته,فقد نبهنا إلى أن نرحم من فى الأرضِ لكى يرحمنا من فى السماء
,ونبهنا على أن نحترم الكبير ونعطف على الصغير(أليس هو من أطال فى السجود لأن أبناء سيدنا على بن أبى طالب كانو يلعبون على كتفهِ الكريمة أثناء السجود)؟؟
نبهنا على احترام الأوقات والمواعيد واحترام العمل(هاتان يدان يحبهما الله ورسوله..) ,أليس هو من اشتغل بالتجارة ,والرعى؟
نبهنا على احترام الجار(قال :صلى الله عليه وسلم:مازالَ جبريلُ يوصينى على الجار حتى ظننتُ أنه سيورثه..صدقت يارسول الله)
ألم يعلمنا قول الله تعالى:ولتجدنَ أقربهم مودة للذين ءامنوا الذين قالوا إنا نصارى ذلك بأن منهم قسيسين ورهباناً..)صدق الله العظيم..
ألم يعلمنا فى سيرته أن نعدلَ بين الزوجات فى كل شئ؟؟ ألم يخبرنا بقول الله تعالى:(مثنى وثلاث ورباع فإن لم تعدلوا فواحدةً أو ماملكت أيمانكم)صدق الله العظيم..
طفلتى وتعاليم نبيي:

فى الصباح عندما تصحو طفلتى فإنها تُصدرُ صراخاً لكى ننتبه إلى أنها استيقظت,وبسرعه نذهب إليها,لأن رسولنا علمنا الرحمه بأبناءنا,وعلمنا أن نعطف عليهم,ولانكون قاسيي القلبِ عليهم..
وبعد ذلك ألعبُ معها حتى يأتى وقتُ الخروج,فتودعنى على الباب(فربيتُ فيها احترام الكبير الذى علمنى إياه الرسول فعملتهُ لها فى صغرها)..
ديننا دينُ يسر:
فى ديننا الكريم,لم نتعلم أن نكون منغلقين على العالم,ولكن متفتحين,وألا نشدد على نفسنا فى العبادات,ولكن يومنا مجزء للعبادة,وللإجتماعيات(فزيارة المريض وزيارة الأهل من الأشياء التقربيه لله تعالى)..وكذلك التقرب للأهل ..الخ..
(إن الدينَ يسرٌ ولن يشاد الدين أحدٌ إلاغلبهُ)..
أىُ دين وصل إلى تلك الرحمة والتراحم والموده؟؟ ,وأى شخصٍ وصل لتلك البلادة فى التفكير لكى يهاجمه بتلك الطريقةِ التى رأيناها من كارهى الإسلام والمسلمين؟؟

لن أطيل عليكم,فانتظرو حكايات طفلتى بعد رجوعها من الحضانه لكى أكمل لكم حكايتها لليوم بإذن الله تعالى..

اقرأ المزيد

Charlie Hebdo These are the children of Muslims

basmala

Charlie Hebdo These are the children of Muslims
This is my baby small, which I try to blog her, to love Alm..nhan to denied our children in one, but the sick souls that think about it, trying to oppress Islam, claiming that extreme, but the fact that they Rao morals of our children a beautiful example of the creation of the Islamic, and that because of the income of many in Islam, so they want to Ichoho the image of Islam in various ways, butAs long as there are parents of writing down ideas of their children, and cast them out of the world, there will be only expose them and their lies on the Muslims, so I promise that brought you my baby stories every day and with all the fact in order to Tarafo how to teach them how Nrbém, and you will see that we Nrbém on compassion, and respect for religions, and do not touch upon the Messenger of the apostles or religions, we are not Sulaity tongue like journalists .Charlie Hebdo

My daughter and the beginning of the day
My baby at the beginning of the day wake up to screaming in order to hear, and we come to it and actually move with haste to it, because we are the merciful, and this is to teach religion, then comes the time to play with us, in order to play the game of hide and smile to each other, in spite of our own business, we wake up early for it, then break our fast together, they eat food sons of the year and a half, we eat food adult, And then my daughter Todany small door she loves me, she (Baba..baba) and then go to work, we have implemented the commandments of the Holy Prophet _saly God be upon him: that our young ones that respects our old ones, and sympathetic to our old ones on our young ones)
Is it taught us that people can go out in order to make fun of him, or is that sarcasm is a human being a coward? Ksahvie this malevolent Gazette on religions?

اقرأ المزيد

بسمله والغسيل

               بسملـــــــــه والغســــــــيل

بسمله بتغسل

"بسمله"بنت نشيطه والحمد لله ونشاطها ده ساعات بيتعبنا,وساعات بيبسطنا,يعني مامتها علشان تخليها تسكت بعد مابوظت كل حاجه,وخليتها تعبت ,فقالت :أديها الغسيل اللى عاوز يتغسل علشان تُحطو فى الغساله,وفعلاً إديتها الغسيل,و"بسمله"كانت بتاخدو وتحطو فى الغساله لحد لما الغساله اتملأت,وبعد كده فضلت تقفل فى باب الغساله..
على فكره الغساله ليها مواقف كتيره مع"بسمله",لأنها فى مرات استخدمتها علشان تخبى فيها الحاجات أو علشان تلعب (أنا قلتلكم قبل كده إن الريدر اللى كنت بحط فيه الكارت الميمورى بتاع الكاميرا ضاع منى وبعد يومين تقريباً أو 3أيام بعد ما اشتريت واحد تانى لقيت اللى ضاع منى فى الغساله )وفى مرات تانى كانت بتحط اللعب بتاعتها فى الغساله علشات تخبيها..
"بسمله" كُل ماتتعلم حاجه وبالذات فيها نشاط تلاقيها علقت فى مُخها (زى المشي,زى مثلاً رمى الزباله فى السله بتاعة الزباله,زى بردو إنها تشيل الحاجه من والدتها,ومنى لما آجى من بره..الخ)..
المهم بعد كده "بسمله" عملت زى امبارح ونامت بدرى واليومين دول يعتبر النوم بدرى على غير عادتها,لأنها كانت بتسهر علشان تلعب معانا ,وتغلس عليه بالذات وأنا باشتغل على اللاب بتاعى..
لكن قبل ماتنام مامتها فضلت تلعبها,وتفرجها على التليفيزيون,لغاية لما طلبت إنها تنام,ونامت بالفعل بعد ماشربت المشروب بتاعها,وبكن من شويه سمعتها وهى بتعيط,(أكيد لازم تصحى لأن الجو برد,والأطفال لما يبردو بيقومو يعيطو فى وسط النوم بتاعهم..

"بسمله"ودولاب الروضه:
أنا قُلتلكم قبل كده إن "بسمله" فى الروضه,وحكيتلكم عن المديره بتاعتها وقصة بنتها..
على فكره المديره دى ,بتبيع حاجات كتير فى الروضه وبره الروضه علشان تحاول إنها تعلم أولادها,(مع العلم:إن جوزها عايش بس مرتبه قليل,ومش بيشتغل شغل تانى).الست دى بجد مكافحه وست جدعه(علشان كده ربنا كارمها..)..الست دى بتاخد 280 تقريباً فى الشهر,وبتبيع كاراتيه وشيبسى وحاجات تانى للأطفال فى الروضه,وتبيع حاجات للستات اللى هما أمهات الأطفال علشان تقدر تلم مبلغ يكفى إيصالات الكهرباء,وإيجار الشقه,والفلوس اللى عاوزه تجهز بيها بنتها,ودروس أولادها التانيين..
المهم:"بسمله"النهرده وقفت قدام الدولاب بتاع الحاجات اللى فى الروضه,وشاورت لمامتها"ده..ده" يعني عاوزه تشترى زى الأولاد اللى زيها فى الحضانه..وفعلاص مامتها اشترتلها من الكانتين ده.. وقالتلى مامة"بسمله":أهو شكلنا هنعمل زى أولياء أمور الأطفال اللى طلبو إن الدولاب ده يتقفل علشان الأطفال مايطلبوش حاجات تانى منه ,(من حلويات ونايتى وكاراتيه وغيره)..المهم أنا قولتلها وماله خليها تشترى..(وبينى وبينكم هو رزق..وربنا يكرمها ..ويكرمنا ويكرم الجميع..
انتظرو حكايات طفلتى ويوم جديد بإذن الله تعالى...تصبحون على خير..

اقرأ المزيد

طفلتى والربح الحلال

طفلتى والربح الحلال

كُل إنسان له اهتماماته الحياتيه,والتى لابد أن يحافظ عليها وينميها لكى يحافظ على عائلته ,وبالأخص الأعمال,علشان كده هكلمكم عن عملى وارتباطه بحياة ابنتى..

العمل والمال:
أنا باشتغل مدرس زى ماقلتلكم قبل كده ,فالصبح بروح المدرسه اللى أنا شغال فيها,والحمد لله الترم الأول ده مافيش يوم عدى عليه غير وصوتى رايح,ومن أول الحصه لأخرها باشرح على كد ما أقدر,وبعد انتهاء اليوم الدراسي,باتغدى وبعد كده أروح أدى دروس بعد المدرسه..

الدروس وحياة ابنتى:
فى بعض الأحيان لما باتفق على درس جديد فى ناس بتحاول تقلل فى التمن بتاع الحصص,وأنا بأوافق,والسبب إنى حاسس بظروف الناس لأنى عارف هما عايشين إزاى لأنى بأعانى نفس مشكلتهم,لأن كل حاجه غليت,وفى ناس أساساً مُجبره إنها تدى أولادهم حصص علشان يقووهم,وأنا محتاج الفلوس علشان أحاول أكفى مصاريف بيتى,علشان كده بأحاول إنى أتساهل,بالرغم إن فى زمايل ليه بياخدو أكتر من الأسعار اللى أنا باخدها...

أُراعى الطالب وابنتى:
فى ناس بتدى الحصص للطلبه الممتازين,ويحاولو إنهم يبعدو عن الجانب المتعب,لكنى بأكون العكس,(لكن فى الآخر باتعب ..وأحاول أقيم),فى مدرسين بيحاولو إنهم يقيمو الطالب قبل مايدوه الدرس,والشاطر منهم يكمل واللى مش شاطر مايرضوش بيه..
لكنى والحمد لله بابدأ مع الضعيف لحد لما أحاول أخليه يقرأ,ويكتب,وكمان أساعده فى مواد تانى,واختلافى إنى بادى أكتر من ماده علشان أساعد الطالب وأولياء الأمور,وأعتقد إنى لما أساعد الطالب وولى الأمر,هييجي يوم وألاقى إن الحاجه دى انعكست على بنتى ,وتلاقى فى يوم من الأيام بعدى اللى يساعدها ويفتكر والدها بالخير,وإن لم يكُن فهو عند الله أكبر وأعظم..

على فكره عندى المدام كل ما أرجع من الشغل تقولى راعى ربنا فى العيال وعلمهم كويس علشان معانا بنت,واللى بتعمله مع العيال بكره وبعدو هيبقالنا فى بنتنا(الحمد لله المدام عندى بتعينى على  الخير,وكمان أنا بأحاول أعرف كل يوم غلطى وأحاول اصححه من أجل عائلتى...
أنا كأى إنسان أحاول أن أربح,ولكن بالحلال من أجل أن يُكرمنى ربى,ويكرم من حولى..
تابعو المزيد من حكايات طفلتى بإذن الله تعالى ,وباقى اليوم..

اقرأ المزيد

طفلتى والموزه

بسمله والموزه

أحكيلكم الحكايه من أول اليوم لحد لما نوصل لقصة الموزه...
الأول أنا كنت حكيتلكم امبارح إن"بسمله"نامت بدرى,لأنها تقريباً كانت تعبانه شويه من البرد وكده..وصحيت  الصبح بدرى,وكانت عاوزه مامتها تلعبها قبل افجر,وتضحك لمامتها,وكانت بقى فايقه لأنها نامت بدرى..
ولما صحيت أنا بقى كنت صاحى متأخر على الإمتحانات(مراقبة إمتحانات)فمامة "بسمله"قالتلى ده انت اتأخرت لأن "بسمله"صحتنى بدرى فطفيت المنيه..المهم أنا قُمت علشان أتوضأ وأصلى,وبعد ماخلصت لقيت إن "بسمله"صحيت,وكانت عاوزه تلعب معايا,وفعلاً بدأت ألعب معايا,ونسيت الشغلوكل حاجه,ولعبنا استُغمايه,وفضلت تضحك معايا كتير,وبعد كده قررت إنى ألبس علشان أطلع,وفعلاً لبست,ووصلتنى "بسمله"لحد باب الشقه,وانتهى اليوم,ورجعت قبل "بسمله"ومامتها,وجبت معايا حاجات للبيت,ولما جت "بسمله"كان فى إيديها "موزه"وبتحاول إنها تقشرها وتاكلها,وماكانتشي عاوزه تُدخُل غير لما تقشرها,لكن مامتها دخلتها جوه,وأول حاجه عملتها"بسمله"إنها دخلت فى الأوضه اللى فيها اللاب بتاعى,لكن المره دى ماخربتشي فى الجهاز,لأنها كانت مشغوله بحكاية الموزه اللى فى إيدها,وفعلاً بدإت تقشرها,وبعد كده بدإت تاكل فيها,والقشر بتاع الموزه,كانت عاوزه مامتها هى اللى ترمهولها,لكنى طلبت منها إن هى اللى ترميه فى الزباله,وفعلاً سمعت"بسمله"الكلام وجرت على السله علشان ترمى قشر الموز,وبعدها رجعت علشان تقعد على الكنبه اللى فى أوضة الجلوس جنبي,وبدإت إنها تلعب بقى جنبي,وتبوظ المكان بالموزه اللى فى إيدها,وبعد كده قررت إنها تدور على النونو فى اللاب توب بتاعى,وبعد شويه مامتها نادمت عليها,ودخلت المطبخ ,وبعدين بدقيقه جت عندى وفى إيدها طماطم من اللى أنا جبته (خدته من فوق الطرابيزه)وبدإت تحاول تفتحه,لحد لما طلعت واحده وفضلت تاكُل فيها,وترفعها فوق,كأنها بتشرب عصير من الزجاجه,وبعد كده راحت المطبخ عند والدتها

بسمله والطماطم

,بعد ماصورتها طبعاً,وهناك كانت والدتها بتعمل عصير موز وشربتها فى المطبخ,وبعد كده جابتلى كوباية عصير ليه,وكانت شايله فى إيديها التانيه"بسمله",وأول مادخلو الأوضه"بسمله"كانت عاوزه تشيل الكوبايه هى,وكإنها عاوزه تعمل إنها هى اللى جابت العصير,وبعد ماشربت شويه,بدإت "بسمله"تتخانق معايا علشان أشربها الكوبايه بتاعتى,وفعلاً شربتها,ومامتها قالتلها:ده إنتى سيبتى سويه من كووبايتك,لكن "بسمله بتحب إن أنا اللى أشربها دلوقتى وأأكلها معايا,وده اللى حصل وأنا بآكل, (لما ماتها حطت الأكل,قعدت وسطنا وبدإت تشد فينا وتقول "أنا...أنا" يعني عاوزه تاخد نصيبها فى القعده ونوفرلها مكان وسطنا..)

حكاية بسمله وصاحبها فى الروضه::
مامة "بسمله"قالتلى شوفت اللى حصل؟؟
قولتلها خير.. قالتلى كان فى ولد صغير واقف ل"بسمله من بره الفصل,وكان بيشاورلها وهى بتشاورله..فقلت من بدايتها كده؟مش صابرين لما يكبرو؟..هههه
العيال دلوقتى بيتطرو مش زى زمان..كل حاجه دلوقتى اتعلموها وفهموها..
أسيبكم دلوقتى,على وعد بإذن الله بإكمال اليوم معكم وحكايات طفلتى الصغيره"بسمله"..

اقرأ المزيد

طفلتى ويوم خلص

بسمله

خلص اليوم,ولكن فى يوم جديد جاى فى مستقبل"بسمله"ويوم عدى من حياتى,سيبنا بقى من الكآبه وأملكم حكاية "بسمله"لليوم السبت17/1/2015  ,احنا انتهينا لحد مابعد صلاة العشاء..
بعد كده"بسمله"رجعت تانى تطلب من مامتها الأكل,ومامتها طبعاً جابتلها أكل تانى ,وهو عباره عن"الباميه" ..وقعدت بقى "بسمله"وفضلت تاكل ,وفى الآخر حطت إيديها جوه الباميه وكانت سخنه,وبعد كده جاتلى مامتها علشان تقولى على اللى حصل,وقالتلى شوف البنت حطت إيديها فى الباميه وهى سخنه؟؟ فقولتلها :علسان تحرم,لكن فى ثوانى لقينا "بسمله قُدامنا وبتجرى وهى مبسوطه وبتضحكلنا,فقالت مامتها:دى مش بتحرم والله.. 
المهم لما جت "بسمله"الأوضه كان فى كوبايه على طرابيزة الأنتريه فمسكتها وكانت هتدلقها,لكن الحمد لله إن ماكانشي فيها غير شويه صغيرين,والحمد لله إن مامتها لحقتها..
وبعد كده جتلى"بسمله"قُدام الجهاز وبدإت تعُض فيه,ولما زعقت فيها,مسكت صُباع إيدي وبدإت إنها تعضه بكل قوه,والحكايه لما مشيت معاها عجبتها الحكايه وبدإت تصرخ علشان تحط صباعى فى بقها وتعضه جامد,لأن فى أسنان جديده بتطلعلها وتاعباها,ومابتصدق إنها تعض أى حاجه اليومين دول,المهم بعد شويه نامت "بسمله"لكن بدرى..وشويه وصحيت,وفضلت تصرخ,وفى الوقت ده زى ماقلتلكم كانت عاوزه تشرب لبن,فشربتها والدتها لبن,وكراويه,وبعد كده نامت تانى,وشويه وصحيت تانى,فخدتها والدتها بعد ماسخنتلها شوية لبن تانى ودخلو أوضتهم علشان ينامو,لكن ما اعتقدشي إن "بسمله" هتنام لحد الصبح نايمه,لأن مش من عوايدها إنها تنام بدرى كده..
انتظرو حكاية "بسمله" الأحد بإذن الله تعالى,وهاحكيلكم على يوم "بسمله من أول اليوم لحد آخره على أجزاء بإذن الرحمان..
فانتظرو جديدنا وجديد طفلتى كل يوم..

اقرأ المزيد

طفلتى ومديرة الحضانه

                     طفلتـــــــــى ومديــــرة الحضـــــــانه

بسمله بتخبط على بابا

"بسمله" فى أشهرها الأولى وبعد انقضاء أجازة مامتها الخاصه بالإنجاب ,قررنا إننا نرجع لبيتنا ونودى "بسمله"لروضة أطفال,بحكم الظروف الخاصه بالشغل بتاعنا أنا وهى,وفعلاً دخلناها الروضه,وكانت فى نصائح خاصه من الوالده بإننا ندى هدايه للعاملين فى الروضه,وده بقى من زوقنا,لأنهم بيتعبو مع العيال,فى ناس هتقول ماهما بياخدو أجر,هقولك أنا بقى: دول بياخدو حوالى 100 جنيه وزادو أو قلو اللهُ أعلم,لكن ده هو الواقع,فيعتبر ده عباره عن إننا بنطلع من المال اللى أعطانا الله لينا لعباد الله اللى ليهم أكيد جزءفرضه ربنا ليهم,واحنا بنطلعه ..
المهم بدأنا نودى البنت الروضه,ولقينا اهتمام بالأطفال,وفى يوم بعد فتره كبيره قررت إنى أزور بنتى"بسمله"لوحدى,وفى اليوم ده كان معايا زميلى فى العمل,وطلبت إنى أشوف بنتى,وكانت دى تقريباً المره التانيه اللى أروح فيها فماكانوش عارفينى كويس,فطلبو منى إثبات الشخصيه,واتصلو على المدام لكن تليفونها كان مقفول,وجابو البنت "بسمله"وكانت لسه صاحيه من النوم ففضلت تبكى,فخافو منى (هههه)وبعد كده "بسمله"جت على رجلى وفضلت تلعب,وأنا قلتلهم خلاص أنا هالعب معاها هنا ومش هاخدها,وبعدين المديره بتاعة الحضانه اتعرفت عليه,وطلبت منى إنى أدى بنتها درس,والحمد لله أكرمتها وطلبت منها أجر قليل ...
الأسباب :

أولاً :أنا كنت عاوز أعمل موقف شيك يخليها تهتم ببنتى,علشان لما تبكى معاهم ألاقى اللى يقُلهم اهتمو بيها وشيلوها,وشوفوها عاوزه إيه والكلام ده,وده لأنى بحب بنتى ومش عاوزها تكون زعلانه فى المكان اللى هى فيه واحنا مشغولين عنها..
تانى سبب: بنت المديره بتاعة الحضانه كانت خارجه من مرض كان بيخليها تتشنج وتتعب جامد(مرض عصبى) وبسبب المرض ده رسبت حوالى سنتين فى الإعدادى,فكانو عاوزين حد يأهلها من جديد ويعرفها تقرأ كويس وتكتب..,الحمد لله بعد فتره صغيره قدرت أعمل معاها حاجه,لأنها كانت واثقه فيه,وكنت باتبع معاها أسلوب تربوى كويس,وكنت براعى والحمد لله فيها ربنا علشان ألاقى ده بكره وبعده فى بنتى "بسمله"
اللى عاوز أوصله..إن احنا لازم نراعى ربنا فى غيرنا علشان غيرنا يراعى ربنا فينا وفى أولادنا..
وإن انت لازم تختار روضة أطفال أو حضانه فيها مديره بتخاف على الأطفال زى كإنهم أولادها,وده اللى انتو أكيد حسيتو بيه ,لما رُحت زرت بنتى ,وفتحو معايا تحقيق وهويتى والحوارات دى اللى بتدل على أمانتهم..
مش هطول عليكم ..علشان أجهزلكم حكايه تانى من حكايات طفلتى بسمله

اقرأ المزيد

طفلتى والعظمه

بسمله والكمبيوتر

"بسمله"بعد ماقمنا من على الأكل,كان فى عظمه خدتها فى إيدها وفضلت تلف بيها وتاكل فى اللحم اللى  فيها,وبعد كده جت عليه وهى فى إييدها العظمه,وفضلت بقى تحط إيديها عليه,وأنا أقولها :خلاص يا"بوسبوس"أيديك مدهنسه,وهى ولا سامعه كلامى,وبتحاول تعدى من تحتى وتلعب ,وبعد كده دخلت علشان أكتب على اللاب توب بتاعى,ووسط الإنهماك بتاعى فى كتابة المواضيع وكده جت "بسمله جنبي ,وأصرت إنها تلعب ب"المصفايه بتاعة المطبخ بتاعة مامتها" وتخبط على الجهاز بيها,لكن أنا رفعتها على الكنبه جنبي,وهى كانت تقريباً بتقيس مدى حُبي ليها,وكانت بترمى نفسها من فوق الكنبه فجأه,والحمد لله كنت بانتبهلها فى آخر لحظه قبل ماتوقع,وأول ماأمسكها تفضل تضحك وتعيد الحركه تانى,ولما زهقت منها زعقتلها علشان تروح لمامتها,ولما فعلاً راحت لمامتها,راحت علشان تشتكيلها,وتقولها"بابا..بابا"يعني إنى مزعلها,ومامتها بقى(بتهدى النفوس) فقالتلها :روحى قوليله "أح..أح"يعني إضربيه,وقوليله :أحسن..
وفعلاً جت "بسمله"عندى وضربتنى وقالتلى"أحن"يعني أحسن,وبعد كده قعدت على السماعه الخارجيه بتاعة الجهاز"سماعه صب" وأنا مش واخد بالى عضا صُباع رجلى,وأنا فضلت أتألم وهى تضحك عليه..وبعد كده دخلت لمامتها علشان أشكيلها من "بوسبوس" وبعد كده اتوضيت علشان أصلى ولما خلصت ونويت أصلى وبدأت فعلاً فى الصلاه لمحتنى "بسمله"وجت جنبي وجابت معاها كيس الكاراتيه اللى كان فى إيديها وجت وقعدت على حجرى,وفضلت تاكل,وبعد كده دخلت تانى لمامتها,وبعد لما خلصت دخلت معايا المطبخ عند مامتها وقعدت على كرسي المطبخ,وفضلت تهز فى رجلها,وكأنها قاعده على شط البحر,وبعدين بدإت إنها تمسك فى السجاده اللى فى الأوضه التانيه وبدإت تلعب بيها,وتوديها يمين وشمال

 ,وبعدين دخلت أنا علشان أكمل كتابه ولقيتها لابسه كيس مغطى وشها وراسها وبتلعب بيه,وكإنها عاوزه تجرب إنها تمشي وهى مغمضه عينيها,والحكايه دى بتعملها كتير,سواء بالمصليه أو بالفوط أو بلبسها..

بسمله والكيس

المهم بعد كده كانت والدتها بتعملنا "أيسون"وجابتلى الكوبايه بتاعتى,ف"بسمله"أصرت إنها تاخد بتاعتى,لكن أنا أقنعتها إن الكوبايه سخنه بإنى خليتها لمستها ففضلت تقرب منها وتقول"أح..أح" يعني الكوبايه سُخنه..وبعدين فضلت تضحك وبعد كده قلتلها يللا بينا"تاتا"وخدتها للأوضه التانيه علشان تشرب كوبايتها الدافيه...
ودلوقتى هى بتلعب مع مامتها ,وأنا دلوقتى خلصت الجزء ده من اليوم بإذن الله,على وعد بإنى أكملكم باقى اليوم بإذن الله من يوميات "بسمله"
انتظرو حكايات طفلتى بسمله

اقرأ المزيد

طفلتى ويوم السبت 17-1-2015

                  طفلتـــــــــى ويوم الســـــــبت 

بسمله نايمه

اليوم وفى بداية اليوم الجديد رأيت "بسمله تنام على السرير على غير عادتها,فهى تصحو قبلنا,فسألت مامتها إيه اللى حصل النهرده مع "بسمله"فقالتلى إنها صحيت بالليل ,وكانت بتقول"أم..أم" يعني عاوزه تاكل,وكان جنب مامة"بسمله" لبن فشربتها الشويه اللى فاضلين,وبعد كده جت تأكلها زبادى,فزعلت ونامت على وشها  من الزعل,وقالتلى مامة "بسمله" هى كانت عاوزه تشرب حاجه بسرعه,ومش فاضيه لأكل الزبادى فزعلت ونامت..المهم صحيت "بسمله الصبح,ولما جيت أطلع وقفتلى قدام باب الشقه كعادتها علشان توصلنى,ولما خلصت اليوم بتاعى فى مراقبة الإمتحان ورجعت لقيت "بسمله واقفالى قدام باب الشقه,ولما شافتنى دخلت جوه تجرى,ولما سألت مامة "بسمله"عن اللى عملته النهرده الآنسه "بسمله فى الحضانه فقالتلى,إنهم وهما راجعين فى العربيه وأول مادخلو العربيه,"بسمله"قالت"أم..أم"يعني عاوزه تاكل,فقالتلها مافيش حاجه دلوقتى فى الشنطه معايا,لكن مع إصرار "بسمله "لما نزلو جابتلها "نايتى"وكلته فى الطريق,وبعدين قالت لمامتها"دى..دى" يعني ترمى فين الورقه,وماكانشي قدامهم سله وكانو على طريق القطر,فقالتلها"إرميها فى الأرض,و"بسمله" بقى ماصدقت,لأنها علطول بترمى الحاجات فى السله بتاعة الزباله,فهى عاوزه تغيير ,وحصلت عليه الآنسه..
المهم,أنا كنت جايب معايا حاجات فى كيس وأنا داخل وهى عباره عن(لبن وزبادى وشيكولاته)ف"بسمله"خدتهم منى مع إنهم تقال عليها,وطارت بيهم جوه الشقه,وبدإت تفتش فيهم علشان تطلع الزبادى واللبن اللى بتحبهم,ووسطهم لقيت"شيكولاته,فحطتها فى بقها,وبدإت تعضعض فيها,لحد لما فتحتهالها مامتها,وبدإت تاكل فيها(كل الأطفال بيحبو الحلويات طبعاً..

بسمله والشيكولاته

"بسمله"بعد ماكلت الشيكولاته"أخدت كيس اللبن فى بُقها,وبدإت إنها تعضعض فيه لحد لما فتحت الكيس,وأنا قلت لما ماتها,وهى جت وشالت الكيس منها,وبعد كده فضلت تلعب فى حاجات مامتها,وبعد كده جه محصل النور فى الشارع وخدتها معايا تحت وكانت فرحانه,وبعد مادفعنا للراجل الفلوس وطلعنا,خبطت على ماما علشان تفتحلنا الباب وفضلت تقول "ماما "وتخبط,وبعد لما فتحت مامتها الباب ودخلنا لقيت الأكل محطوط,واستعدت للأكل,وماسكه المعلقه دلوقتى وشغاله تخبط فى الصحون..
انتظرو باقى اليوم علشان أحكيلكم على جديد طفلتى"بسمله"

اقرأ المزيد

طفلتى وفريق التدوين

اتصل بنا

إخوانى الكرام ,يمكن أن أكون قد خصصت تلك المدونةِ لطفلتى الكريمه"بسمله"ولكن لن يمنع ذلك من مشاركتنا  جميعاً قصص أطفالنا الكرام,ولكى نستطيع جميعاً أن نتعاون فى إيصال شئٌ من الواقع الذى يعيشهُ أطفالنا,ونوحد بين ثقافاتنا,فقدد قررت إدارة مدونة "طفلتى"أن تفتح بريدها الإلكترونى للراغبين فى التدوين عن يوميات أطفالهم معنا من خلال إرسال رساله عبر اتصل بنا هنــــــــا
ويكون فى تلك الرسالة البريد الإلكترونى الخاص بجوجل ,لكى نستطيع أن نجعلهُ ضمن فريق التدوين,ويستطيع نشر تدوينات خاصه بطفلهِ أو طفلته ,مدعومه بصور ,وأن يكون عدد سطور تدوينتهِ لاتقل عن 10 سطور,مفصلةً يومية طفلته ,والأحداث يوماً بيوم..
من خلال مدونة "طفلتى" سوف تحظون بعد دهرٍ من الزمن باحترامٍ من أطفالكم ,وسيعلمون أنكم تركتم لهم,ماتثبتون به حبكم لهم..
سوف نتلقى رسائلكم بإذن الله تعالى ونفرزها بعنايه,ويرجى دعم رسالتكم بذكر خبراتكم مع التدوين,,
وسيلاحظ أن من يخالف قواعد التدوين ستقوم إدارة المدونه بحذفه من التحرير الخاص بالمدونه..
المدونه والحمد لله لها زوار من الأجانب ومعظم الدول العربيه,فمرحباً بإشهار تدوينات أطفالكم معنا..

اقرأ المزيد