 |
| بسمله بعد البث |
"بسمله"كانت علطول عاوزه تقعد جنب الجهاز ومش عاوزه حد يقومها من جنبه خالص,لكن المره دى بالتحديد "بسمله" وأثناء البث كانت عاوزه تاكل المايك,وبعد كده ماكانتشي عاوزه تقعد تانى قدام اللاب توب,وأنا حاولت أستنتج السبب,فقلتلكم فى الدردشه إنها عاوزه تنام,لكن بعد شويه دخلت المطبخ,ولقيت"بسمله"ماسكه جناح الفرخه,وعماله تاكل فيه,وفرحانه بيه..
ولما لقيت الشغل ده بيحصل قلت فى مخى(يبقى سابت البث والناس علشان شمت ريحة الأكل؟؟ :) ) شفتو بقى العيال الصغيره؟ مع إنها الأول ماكانتشي بتحب الأكل,المهم مامة "بسمله"حطت الأكل وبدأنا ناكل,و"بسمله" قعدت فى حضن والدتها علشان تأكلها ,وكلت معانا الآنسه "بسمله" وبعد كده أنا قمت على الجهاز,وشويه,ورجعتلهم,ولقيت "بسمله" شغاله تاكل"تتيه" هى بتسمي الكارتيه كده بقى..
وأول ماجيت أصورها ,ماكانتشي مهتمه بيه,لأنها ساعة لما تاكل الكاراتيه بتنتبهلو أكتر من أى حد,لكن فى غير الوقت ده بتحب إنها تيجي عندى علشان نلعب مع بعض,وتغلس عليه وأنا باشتغل فى بعض الأحيان,ودلوقتى "بسمله"مطلعه عين أمها فى الأوضه التانيه,ومش قادره مامتها عليها,وشغاله تصرخ فيها وبردو ولا كإنها بتعمل حاجه,وأول مايكون الواحد زعلان من "بسمله"هى الآنسه بتشغل علينا السياسه,وتقولنا كلام من كلامها الحلو"بابا...ماما.تاتا..نونه"وبندأ احنا نهدى ونفقد التعصب بتاعنا..
على فكره الأطفال موسوعه من السياسه اللى مش ممكن نقدر عليها..
بسمله والكاراتيه:
على فكره أنا ساعات علشان أخلص نفسي من دوشة "بسمله" باجيبلها "كاراتيه"وشيبسي..علشان تهدى شويه عن اللعب والكسير والخبط والرزع,وساعات باستخدم معاها المشي ..
بس خلو بالكم الكاراتيه مش باستخدمه علطول علشان المواد الحافظه,إنما باديهولها فى أوقات معينه,يعني مره أو اتنين فى اليوم مش أكتر علشان ماتتعبشي منى..
انتظرو المزيد من حكاية طفلتى على مدار اليوم ..وكل يوم
0 التعليقات:
إرسال تعليق