 |
| بسمله بتلعب فى للاب توب |
هى حاجات بتدور فى راسي كتير لما بشوف "بسمله"قدامى:
إمتى تحبى:
فى المراحل الأولى من ولادة طفلتى وهى قدامى صغيره بترضع كنت بقول إمتى ألاقيها بتحبي قدامى,وأتمتع بمنظرها,بدال ماهى كده علطول قدامى مش بتتحرك,وكل ما أحطها فى حته ألاقيها زى ماهى,وكنت بادعى ربنا إنى أشوف ايوم ده قريب..
والحمد لله تم,ولقيتها بتحبي قُدامى,ومش سايبه مكان غير لما تخبر فيه..
إمتى تمشي:
وبعد ماحبت وفضلت تتنقل من مكان لمكان بإيديها اللى تعبت من كُتر الزحف والحبيه من مكان لمكان إتمنيت إنى أشوفها بتمشي وتقدر إنها تجرى وأنا أجرى وراها,والحمد لله هى دلوقتى بتمشي وبتوصل للحاجات اللى فوق الطرابيزه وتحت الطرابيزه لحد لما طلعت عينينا,ومش بتسيب حاجاتى ولا حاجات مامتها غير لماتخربها..
إمتى تكبر وتُدخُلِ المدرسه:
باتمنى إنى أشوفها كبرت شويه ودخلت المدرسه,وألف بقى فى الشوارع علشان أجيبلها لبس المدرسه,وأجيبلها الكشاكيل والكراريس علشان تكتب فيهم الواجبات بتاعتها,وأشوفها وهى بتذاكر بكُلِ همه ونشاط,بدون كسل أو ملل,ومامتها تذاكرلها,ولما تقولى مامة"بسملها"ذاكرلها هقولها"لأ..طبعاً" لأنى هكون بقى باشتغل علشان أوفرلهم مصاريفهم..(حجتنا دايماً ههه)..
إمتى أشوفها وهى عروسه:
باتمنى إنى أشوفها عروسه كبيره جميله ,محافظه على نفسها,وبتراعى ربنا فى كل خطوه بتعملها,وتحاول تفيد نفسها وغيرها,واتمنى إنى أشوفها دكتوره أو مدرسه أو مهندسه,أو أى وظيفه هى تحبها المهم إنها تفيد بيها غيرها,ولو جوزها عاوزها تقعد فى البيت يبقى تُقعُد,لأن جوزها بقى هيبقى مقامه فى مقامى,وأكتر(لأنه هو اللى هيحمي عرضى)..
وإمتى أقول لجوز بنتى بارك اللهُ فيك,وأتمنى إنه مايزعلشى منى فى يوم,,وإنه يكون شاب كويس..وإن بنتى ماتزعلهوش فى يوم..
وأتمنى إن ربنا يدينى طولة العمر لحد لما أشوفها بقى اتجوزت ,ولما أشوف عيالها..
إمتى لما أموت تقرى مدونتها:
أتمنى إنى لما أموت إن "بسمله"تقرأ مدونتها وتحاول تفتكرنى بالخير وتدعيلى,وتقرا المدونه وتضحك على يومياتها..
يوميات طفلتى لاتنتهى ..فانتظرو المزيد
0 التعليقات:
إرسال تعليق