 |
| طفلتى على المصليه |
شاهد الفيديو فى الأسفل آخر التدوينه..
طفلتى بتحب تلعب معايا أثناء وأنا باصلى والفيديو اللى قدامنا ده بيحكى فترة صلاة الظهر,وأنا بأحاول إنى أفرش المصليه علشان أصلى واتفاجأت ب"بسمله"وهى بتحاول إنها تاخد المصليه من قدامى,وهى فعلاً عملت كده,وطارت بالمصليه من قدامى,وراحت بيها أوضة الجلوس,وهى اتعودت على حاجه جديده,واللى هى إنها تغطى وشها بالحاجات,وتمشي,وطبعاً فى بعض الأحيان بتوقع لأنها مش بتشوف اللى قدامها,وهى فكرتنى بنفسي,لأنى من يومين كده,وانتو عارفين الجو شتاء,وكنت راكب الموتوسيكل فالشال حبيت إنى أظبطه فجه على عينى وحجب عنى الرؤيه,وفضلت ماشي يمكن 10 ثوانى وأنا مش شايف قدامى,ولكن الحمد لله إن ماحدش كان قدامى,وإلا كانت حصلت حادثه لاقدر الله..
المهم نكمل حكايتنا عن "بسمله النهرده,وتانى حاجه المهم وأنا بصلى صلاة العصر جت ونامت قدامى,وبالأحرى بقى قدام راسي,وكل ما أحاول أزيحها ناحية السجاده تيجي تانى تحتى وتضحك بالعند,وأول ما مامتها تيجي تصلى بقى ,يحصل معاها عكسي..
بتيجي تبكى علشان مامتها مش بتكلمها,وتكون عاوزاها تجيبلها حاجه من أى مكان,وأول ماتردش عليه مامتها بقى تفضل تعيط وتصرخ بصوت عالى..
على فكره "بسمله"نامت من شويه وصحيت تصرخ ووتقلب كتير,وفضلت ألاعبها,وأشيلها شويه,وبالرغم من كل ده كلو بردو مارضيتشي تبطل صريخ وبكاء,ولما خلصت مامتها شغل البيت بتاعها,عرفت هى إيه اللى بيخليها تبكى,وتخيلو إيه ده..
"بسمله"اتعودت إنها لما تصحى من النوم لازم تشرب لبن أو أى مشروب سائل,وإلا تخرب الدنيا,وعلى فكره زميلاتها اللى معاها فى الشغل حذروها من إنها تعود البنت على إنها تشرب السوائل بعد النوم مباشرةً لأنها هتتعود على كده لحد لما تكبر,لكنها ماسمعتشي الكلام,واللى بيحصل إن بسمله حتى لو صحيت فى نص الليل أو أول الصبح حتى لو ضدفه لازم تشرب أى سوائل ,لأنها اتعودت على كده..
على فكره "بسمله"دلوقتى بدإت تخريب تانى,واللى بتعمله دلوقتى إنها بتاخد العيش من مامتها وتبدأ إنها تقطعه حتت صغيره وتلف بيه فى الأوض وترميه على الأرض والبعض اللى مش كتير منه بتاكله..
"بسمله"لحد ما تنام وهى بتشتغل تخريب,واليوم اللى ماتعملشي فيه كده لازم نعرف إنها تعبانه أو زعلانه من حاجه أو مخضوضه,ولازم نعالج الوضع ده بسرعه...
إحنا بنحاول على قد مانقدر ننتبه ليها طوال الوقت ,ومع إن ده متعب لينا بس بنحاول,لكن طبعاً الأب بيطنش شويه,والأم بقى معظم الوقت هى اللى عليها العبء الأكبر(ربنا يكون فى عونها..
حكايات الطفوله لاتنتهى ..انتظرو المزيد من حكايات طفلتى..
0 التعليقات:
إرسال تعليق