أنا مش عارف فى اليوم ده حصل ايه,لكن أهو ظاهر قدامكم فى الصور إن بسمله كانت بتخنقنى,بس الله أعلم إيه السبب,بس هو سبب من الأسباب دى:
إما إن هى كانت عاوزانى ألعب معاها:لإنها مش بتحب حد ينام قدامها أو يتغطى,وكمان هى فى الوقت ده كانت طالبه معاها لعب ونشاط غيرمسبوقى النظير,وأنا كانت طالبه معايا نوم الصراحه فى الجو الثلج اللى احنا فيه ده..
أو لإنها كانت عاوزه تقعد على المخده اللى أنا نايم عليها لإنها متعوده بردو إنها تقعد عليها وماحدش ينام فى اللحظه دى,وإلا تقعد تزق فيه وتصرخ لحد لما يقوم من الكرسي(قصدى المخده بتاعة السرير)..
على فكره "بسمله"طيبه جداً إنما تقريباً واخده حته من العصبيه بتاعتى,فكل شويه تطلع العصبيه دى فى مواقف ,أهمها لما تكون :
عاوزه تلعب:
لما تحب تلعب وانت تكون مش عاوز تلعب معاها تفضل تصرخ وترمى نفسها فى الأرض لحد لما ألعب معاها,أو أسايسها ب"تاتا" وأخدها من إيدها ونتمشي فى الشقه..
عاوزه تخرب حاجه:
لما تكون حاجه فى إيدها مثلاً وتكون عاوزه تتعرف عليها بالخبط أو العض,أو عاوزه تخطف حاجه منى ,وفى الساعه دى لما آخد الحاجه منها,أو أزعقلها تفضل تصرخ وتتعصب وتفضل تنزل دموع الدنيا كلها..
صاحيه من النوم:
لما حد يصحيها من النوم,أو تصحى وماتلاقيش الأكل اللى متعوده عليه بالليل زى اللبن والزبادى تفضل تصرخ وتعيط وتسمع كل الجيران اللى فى البيت واللى حوالينا واللى فى الشوارع التانيه..
حد طالع:
ده كان فى الأول,بس دلوقتى قل شويه,وكان لما حد يحب يطلع بره لازم ياخدها معاه ,وإلا تفضل تصرخ,وتدمع لحد لما تصعب عليناونضطر إننا ناخدها معانا,لكن فى الجو ده مش بنطاوعها طبعاً..
انتظرو المزيد من حكايات "بسمله"
0 التعليقات:
إرسال تعليق