 |
| بسمله وكيس أيسون |
بسمله فى صباح اليوم:
فى بداية اليوم الجديد صحيت "بسمله"وكلها نشاط ,لأنها نامت بدرى امبارح,المهم لما دخلت الأوضه اللى هى فيها,وفتحت الدرج علشان أجيب حاجه منو لقيت معايا علبة سجاير كنت بادى منها الناس فى الأفراح,لكن ده من فتره كبيره(لإننا دلوقتى مش بنستخدم غير الحلاوه فى الأفراح علشان نتحى بيها الناس),المهم وعلشان أشيلها منها عملت العجب,إستخدمت حكاية"تاتا لكن مانفعشي,ومسكتها عود بخور لكن رمتو من إيدها,وبعد كده إديتها علبة مرهم علشان تسكت,واتمشيت معاها بعد كده..
بعد كده بدأنا نلعب استغومايه مع بعض,وهى تتخبى منى ولما أمسكها تضحك,ولما تمسكنى تضحك,وبعد كده كملت لبسي علشان أروح الشغل,وطلعت ورحت الشغل وبعد كده..
بسمله بعد فترة الظهيره:
رجعت من الشغل قبل"بسمله"ومامتها وبدأت أشتغل على اللاب بتاعى,وبعد فتره وصلت "بسمله ومامتها من الشغل,وكان فى إيديهم شوية حاجات من العطار"كسبره ,وأيسون,ونشا",وكان معاهم بردو كاراتيه كبير,الMISS بتاعة "بسمله" أقنعت مامة "بسمله" إن فيه جوايز ,وإنها كانت عاوزه تاكُل زيه فى الصبح لكنها نامت,فمامة "بسمله اشترتهولها من عندهم فى الحضانه..
وكلت منه شويه واتفضل منو شويه تانى جابتهوملها معاها علشان تاكلهم وكمان زبادى..
"بسمله" وأكياس العطار:
"بسمله ماسابتشي الأكياس اللى جابتهم مامتها زى ماهما,لأ بقى مسكتهم ببُقها,وفضلت تاكل فى الكيس,لحد لما قطعت كيس النشادر,ومامتها شافتها فخدته منها,وبعد كده "بسمله"مسكت كيس تانى,وهو كيس الكُسبره"وفضلت تعض فيه,لكن مامتها خدته منها,وفضلت تزعقلها ,وفضلت"بسمله تبكى لأنها كانت عاوزه تكمل أكل فى الكيس..
"بسمله"والجاروف:
"بسمله"بقى مش هتقعد ساكته ففضلت تدور على حاجه تكسر فيها وتلعب بيها,وبعد بقى الصبر بقى لازم ييجي النجاح فلقيت الجاروف وبدإت إنها تخبط بيه,وتلعب بيه,وأنا بسرعه صورتها بس بعد عذاب ,لأنى كل ما أصورها صوره ألاقيها راحت يمين وشمال لحد لما صورتها بردو..
"بسمله" ووجبة الغداء:
دخلنا بقى علشان ناكل,ولقيت بقى "بسمله"مامتها بتأكلها,وأنا كنت عاوز آكل فقلت لمامة "بسمله"فين الأرز,فقالتلى:أنا شايلاه منها علشان ماتلعبش بالملعقه,وجابتلى الأرز,وبسمله فضلت تشد فى الملعقه,وبعد لما مالقيتشي فايده فعملت نفسها بتأكلنى,وماعرفتش آكل منها,وفى الآخر نتشت منى الملعقه وفضلت تخبط فى الأطباق اللى قدامها,فقُمت وقُلت مش هكمل أكل..
"بسمله" والمطبخ:
دخلت "بسمله" فى المطبخ وفضلت تلف فيه,علشان المطبخ بقى فيه حاجات كتيره ممكن تلعب بيها,وطلعت البصل وفضلت تخبط بيه ,ومسكت المصفايه بتاعة مامتها وفضلت تعُض فيها لما سنانها وجعتها..
وبعد كده دخلت "بسمله"مع مامتها البلكونه وفضلت تلعب فى الحاجات المركونه فى البلكونه,وفضلت تقول "بابا..بابا" كإنها بتلاغيني(ههه) ووقعت على الأرض فى البلكونه..ودلوقتى بتعمل أصوات علشان فرحانه بصوتها..
حكايات طفلتى مستمره فانتظروا المزيد منها..
0 التعليقات:
إرسال تعليق